A capela do Torrente Ballester encheuse para contemplar e participar do
espectáculo recitativo e musical, baseado na obra de Rosalía, que a Sociedade
Cultural Medulio ofreceu o día 24 ás 18 horas. Na primeira parte do programa,
coa participación de Elia Rico, Ramón Afonzo e Loreto Castro, recitáronse os
seguintes poemas de Follas Novas:
Soia!, Pelouro que roda, Xigantescos Olmos, A Bandolinata, Decides que o
matrimonio, Xan e ¡Para Habana!. De Cantares
Gallegos, Un repoludo gaiteiro. Acompañou ao violín, Nélida Santiago, con
profesionalidade e habelencia. Deixouse constancia , con dignidade artística e
adecuación, da complexidade, amplitude e
transcendencia dunha poesía inigualábel.
Na segunda parte, coas voces de Xoán Padín e Lidia Piñeiro, e o
acompañamento musical de Moncho do Orzán (acordeonista), Alberte Maceiras
(gaita e percusión), e Nélida Santiago (violín) cobraron vida Daquelas que
cantan as pombas e as frores, No ceo, azul crarísmo, Por que miña almiña…, e
Vamos bebendo, de Follas Novas. Logo
veu Alborada, de Cantares Gallegos,
tocada conforme á partitura orixinal e cantada por Lidia Piñeiro, nun exercicio
de control vocal e pericia, que asombrou, como pasmou a voz de Xoán Padin, quen
rematou o acto cunha receita de Rosalía, moi apropiada para os tempos que
corren, de grande efecto desintoxicador,
Probe Galicia…., de Cantares Gallegos.
O público participou, encantado, gozou e pediu a repetición de Vamos bebendo e
de Probe Galicia, non debes/ chamarte nunca española…A pericia técnica e a
vitalidade dos músicos non foi desmerecida polas voces, en solitario ou a dúo,
de Xoán e Lidia, senón sublimada. Todos eles, coa súa colaboración
desinteresada e o seu esforzo, fixeron posíbel un espectáculo que comunicou o
amparo e a vitalidade que a obra de Rosalía de Castro nos entrega.
Unha galería de fotos ilustrativas pode ser aquí contemplada, así como
ouvida e contemplada a gravación enteira do espectáculo en vídeo. A vistosa escenografía foi obra de Avelino Castro (tres cadros de referente rosaliano) e de Ladislau da Regueira (imaxes proxectadas)
0 comentários:
Postar um comentário