Sociedade Cultural Medulio

Como estaba previsto, celebrouse o 13 de abril a palestra sobre o impacto da eólica mariña no ecosistema da plataforma continental galega, as consecuencias para o sector pesqueiro e o espolio que significa dos nosos recursos sen que haxa un impacto positivo na economía e sociedade de Galiza. Así o puxo de manifesto a documentada disertación de Torcuato Teixeira no acto organizado pola Sociedade Cultural Medulio no Antigo Hospicio, e o debate que oirixinou entre os asistentes. Se para a pesca, os proxectos que se queren pór en marcha, por parte de grandes grupos enerxéticos e financeiros, significa a destrución dun sector económico no que Galiza aínda é unha grande potencia, para o ecosistema pode falarse de devastación e alteracións con secuelas máis que previsíbeis para a fauna dos caladoiros. Non cabe a menor dúbida de que se quere orixinar unha desmesurada produción de enerxía eléctrica desta procedencia con destino á exportación, nun país xa exportador, sen que sirva para a dinamización e o desenvolvemento interno, isto é, desempeñar unha función claramente colonial. Parece como se só houbese mar e vento nas costas de Galiza, donde se quere instalar case o cincuenta por cento da potencia proxectada

O día 1 de marzo, ás 19.30 do serán, tivo lugar a presentación dos 7 tomos do Teatro de Manuel Lourenzo, editados por Galiza Cultura, organización na que está integrada a nosa Sociedade MEDULIO. Contouse coa presenza do autor, o máis importante dramaturgo galego vivo, e un dos máis importantes dos séculos XX e o que vai de XXI, para alén de ser director de teatro e actor. No acto interviu o presidente de Galiza Cultura, Xosé Manuel Carril, que explicou por que asumiron o reto da edición de obra tan voluminosa e puxo de manifesto a calidade da mesma, enfatizando tamén o papel de Manuel Lourenzo como intelectual comprometido co país, e impulsor e dinamizador de inicitaivas encamiñadas ao uso normal do galego na escena. O Grupo de Teatro de Medulio (en concreto, as actrices Ángeles Chedas, Luisa Sánchez Meizoso e Elia Rico Lagarón) fixo unha leitura, intencionada, de dúas pezas curtas do autor, As Amigas e A Terraza, como botón de mostra do seu teatro social, que foi moi aplaudida. Finalmente, Manuel Lourenzo respendeu, nunha entrevista no escenario, ás preguntas de Ángeles Chedas, que foi seguida con moita atención e interese polo público. Ao seu remate, os asistentes, postos en pé, renderon tributo de admiración a Manuel Lourenzo, con calurosos aplausos. Anexamos o video da entrevista para a súa audición e visión.

Celebrouse, como estaba previsto o día 1 de febreiro no Antigo Hospicio, correndo a cargo de Xosé Luis Axeitos, especialista na vida e obra do polígrafo. Desenvolveuse, após a intervención de Axeitos, un animado coloquio que versou sobre o problema nacional galego e a aparición do nacionalismo como movemento político das nacións sen estado no século XIX. Asemade tratáronse cuestións como a do uso do concepto raza na historiografía do século XIX ou a integración na formación cultural da sociedade galega de figuras e obras como as de Murguía. Quedouse de volver sobre a súa obra proximamente.

Coincidindo co 23 de febreiro, data do nacemento da nosa escritora, Medulio organizou un acto que se desenvolveu en tres partes. A primeira foi a proxección do video I ante aquel silencio mudo. Rosalía e Cantares Gallegos, unha produción da AS-PG, realizada en 2013, coincidindo co 150 aniversario do libro citado. A segunda, un recitado de poemas de Cantares e Follas Novas, a cargo do Grupo de Teatro da Sociedade. Nun pequeno descanso sorteáronse dez libros, entre o público asistente, co título Personaxes da Galiza medieval, editados pola Asociación Cultural O Galo de Santiago, e agasallados a Medulio con esta finalidade. A terceira parte consistiu nos poemas musicados, a cargo de Xoán Padín (voz e guitarra), Alberte Maceiras (zanfoña e percusión) e Luisa Sánchez Meizoso (voz). O conxunto resultou un espectáculo que subliñou o valor da poesía de Rosalía de Castro, pondo, como sempre, en relevo a súa vixencia e cualidade comunicativa, demostradas pola entusiasta reacción e o agradecemento do público. Nesta ocasión, o repertorio estivo formado por seis cancións estreadas xa en celebracións anteriores, e catro inéditas, especialmente para esta ocasión. Medulio, fuxindo de celebracións rituais, está empeñado en espallar entre o público, a obra de Rosalía, en particular a poesía, e o recurso a musicala aparece como un instrumento de moi alta eficacia.