O tempo acompañounos na nosa excursión o día 4 de novembro para contemplar
a exposición do Mestre Mateo no Pazo de Xelmírez e o Panteón Real na Catedral.
Entre chuvia e raiolas de sol, na parte
central do día e pola tarde, puidemos gozar da arte, do coñecemento da historia
e dun ambiente acolledor nunha Compostela, pouco abafada por turistas.
Primeiro, percorremos a Praza de Cervantes, antiga do Campo, contemplando a
policromía gótica da Adoración dos Reis, que se conserva depositada na igrexa
de San Bieito. A seguir, paseo pola Praza de Abastos, chea de vida, de xente, e
de diversidade de produtos alimentarios, con parada en San Fiz de Solovio para
observar e comparar o tímpano, con policromía descolorida, similar ao anterior.
Logo, en dirección á Praza do Obradoiro, á espera de podermos entrar ás 13
horas na Exposición do Mestre Mateo, tal e como se nos dera cita.
Permanecemos uns 45 minutos analizando e explicando as grandiosas estatuas
que adornaban as xambas dos arcos de entrada, desaparecidos, ao Pórtico da
Gloria, todas elas personaxes bíblicas, profetas para a tradición hebrea,
islámica e cristiá: David e Salomón; Abraham e Isaac; Elías e Enoch….e moitas
máis pezas menores, pero ilustrativas do moito que desapareceu da fachada da
catedral románica de Compostela…
Máis dunha hora levounos ilustrarnos sobre os vultos xacentes dos reis que
teñen a súa tumba no panteón Real de Santiago, e os avatares polos que pasaron
estes sarcófagos…A raíña Berenguela, esposa de Afonso VII, o Emperador,
Fernando II, o seu fillo, Afonso VIII, o seu neto..e Raimundo de Borgoña ou Fernando Afonso? Isto
é, o inicio da familia real á que aludimos, polo tanto o bisavó de Afonso VIII,
ou o fillo deste, e neto de Fernando II?
Todo parece indicar que, malia a placa oficial, que o toma por Raimundo de
Borgoña, estamos perante Fernando Afonso, morto aos 22 anos, un mozo
galego-portugués, por pai e nai, a quen estaba destinado reinar, e continuar a
liña estratéxica dos seus antepasados, a reunificación con Portugal, a
convivencia co mundo xudeu e islámico, a potenciación dos concellos, vilas
comerciais e de artesáns, e a oposición ao hexemonismo castelán…A súa morte
facilitou a unión monárquica coa Castela de Fernando III, e o inicio da
hexemonía castelán….Até entón o reino de Galiza viviu unha etapa de esplendor
que culminou nos reinados de Fernando II e Afonso VIII, co remate do Pórtico da
Gloria, o Coro Lígneo, e, por fin, en 2011, a consagración de toda a catedral,
nunha formidable cerimonia destinada a pór de manifesto a grandeza, o poder e a lexitimidade dunha visión cristiá do mundo de
aqueles monarcas que sufriron os ataques, descualificacións e pauliñas papais,
por consideralos herexes e heterodoxos, polos seus matrimonios en grao de
parentesco prohibido e polas súas relacións co Islam e os xudeus.
Penosa información histórica tanto na Exposición do Mestre Mateo como no
Panteón, e na Colexiata do Sar…Os reis son do reino de León…Nin o Reino de
Galiza nin Galiza existen para nada….Por suposto, e paralelamente, folletos
informativos só en español e inglés, agás previa petición, e tirados da
ocultación, e con portada en español (Maestro Mateo), na exposición sobre este
director de obras do Pórtico da Gloria….A sensación foi a de sermos
estranxeiros na propia patria…Como non había follas de reclamación, todos os
membros da excursión decidimos facer unha protesta por escrito e enviala á
Fundación Catedral Santiago de Compostela.
Xa, entre lusco e fusco, contra as 18 horas, de regreso a casa…Canta
historia, canta arte, detrás dun patrimonio que se xerou xustamente cando a
única lingua oral e a única da arte literaria no noso país era o galego…Canta
ocultación, canta desmemoria, para ignorar de onde vimos, quen somos e ao que
temos dereito como pobo…
0 comentários:
Postar um comentário