25 Maio, sábado, ás 19.00h. Concerto coro e banda de música de Solfa en Ferrol, no  Centro Torrente Ballester, na rúa de Concepción Arenal.

A Asociación Cultural-Musical Solfa fundouse no ano 97 e, desde esa data, centrou o seu traballo na formación musical da xuventude e no goce da música. Como froito do traballo destes anos, naceron a Banda de Música de  Solfa, composta por 30 instrumentistas, e unha Agrupación Coral formada por  25 persoas.

Solfa promoveu e impulsou diversos concertos, intercambios culturais con outras agrupacións, bandas e corais. Entre os seus proxectos máis innovadores e integradores, cabe destacar A Nosa Clave (concertos conxuntos da Banda Filharmónica de Galiza e sete corais compostelás) e Musigalizando (campamentos musicais para rapaces e rapazas de diferentes bandas do país). 

O repertorio coral está constituído por obras de diferentes estilos e temas: clásicos, portugueses, brasileiros… e sempre cun lugar destacado para os temas populares galegos e para as composicións sobre textos de poetas galegos. Estreou Solfa varias obras de compositores vinculados ao coro: Xosé Carlos Seráns (director-fundador) e Francisco Tobar, actual director.

Solfa forma parte do tecido cultural do país coa clara conciencia de saber que existimos porque temos cultura propia e a esa cultura debe Solfa a razón da súa existencia: a nosa música, a nosa literatura, a nosa lingua… en definitiva, Galiza.

Programa 

Banda de Música de Solfa

Director: Fernando Rey Mayo.

Coral de Solfa

Director: Francisco Tobar Cereijo