Medulio participou o día 23 de marzo ás 12 da mañá no homenaxe a Carvalho Calero, organizado polo BNG de Ferrol, a carón da casa natal, en ruínas, do escritor en Ferrol Vello. No acto recitaron poemas Loreto de Castro e Luisa Sánchez Meizoso, e interveu o portavoz ddo BNG no concello, Iván Rivas, quen reivindicou, máis unha vez, que se cumpra o compromiso da restauración da casa do escritor e a súa dedicación a usos culturais relacionados coa súa traxectoria vital e a súa obra. O acto rematou cunha ofrenda floral e a entoación do himno galego.
O día 12 de marzo celebrouse a segunda palestra sobre a Historia de Benito Vicetto, dentro do ciclo sobre o escritor, organizado por MEDULIO e FERROLTERRA ANTIGA, co gallo dos douscentos anos do seu nacemento. Versou sobre a etapa da Idade Moderna e da Contemporánea, estando a cargo respectivamente de Rubén Labisbal e Manuela SAantalla. O salón do Antigo Hospicio volveu encherse de público. Rubén Labisbal foi sinalando todos os episodios e personaxes que demostran que, malia a doma estabelecida polos Reis Católicos sobre o reino de Galiza, este seguía a ter unha dinámica política propia e sectores das clases dirixentes desacougados e contestatarias en relación co papel a que estabamos sometidos dentro da monarquía dos Austrias e e dos Borbóns. Manuela Santalla explicou as raíces liberais do pensamento e da concepción histórica de Vicetto a través da súa forma de interpretar os movementos políticos do século XIX e tamén a súa visión favorábel a que a muller participase dos dereitos políticos dos cidadáns.
O sábado, día 10 deste mes de marzo, inaugurouse a exposición de viñetas de O Carrabouxo (40) na Sala Julia Minguillón do Torrente Ballester, que permanecerá até o 9 de abril. Trátase dunha antoloxía, moi sintética, claro está, do humorismo gráfico que Xosé Lois González Vázquez, O Carrabouxo, espallou na prensa escrita. O propio autor explicou ao público asistente cal era a intención que nutría as súas ilustracións, feitas desde a consideración de ver o mundo desde Galiza, isto é, tomando o pobo galego como centro de experiencia universal e balcón desde o que observar a humanidade, pois dela formamos parte. Realmente, é este o personaxe máis popular creado polo seu autor, como expresión da psicoloxía e pensamento dun galego, home popular, sabio pola experiencia da vida, cauto pero incisivo ideoloxicamente, que nos vai espindo a realidade das vendas que a encobren. Puxo varios exemplos entre as viñetas que alí se poden contemplar, aclarando en que contextos socio-políticos foron orixinadas. A presidenta da Sociedade Cultural Medulio, Elia Rico, manifestou a súa satisfacción e a da sociedade que preside por colaborar ao recoñecemento público dun artista, ilustrador e humorista que forma parte do mellor acervo que, neste campo, ten producido a cultura galega. En liñas similares, expresouse o concelleiro de Cultura do Concello de Ferrol, Ponte Far, institución que concedeu o espazo para realizar a exposición.
